Innra barnið

Hinir uppstignu meistarar hafa vísað til sálarinnar sem barnsins sem býr innra með okkur. Sálfræðingar hafa kallað sálina „innra barnið“. Sálin með einhverju öðru nafni er enn sálin. Og við erum foreldrar hennar og kennarar, á sama hátt og við erum nemendur hennar.

Ábyrgð okkar við innra barnið

Það er á okkar ábyrgð að innræta sálinni daglega (1) hvað er rétt — hvað er raunverulegt og varanlegt og því vert að varðveita — og (2) hvað er rangt — hvað er ekki raunverulegt og ekki varanlegt og þess vegna ekki vert að varðveita heldur verði kastað í hinn helga eld.

Hinir uppstignu meistarar ætlast ekki til að við séum leidd á asnaeyrunum af öllum duttlungum sálar okkar, jafnvel eins og þeir ætlast ekki til að við látum undan öllum duttlungum barna okkar. Þar sem sálin er barnið okkar uns hún verður fullorðin, verðum við að elska og vernda, leiðbeina og aga hana á andlegu leiðinni.

El Morya segir að við ættum ekki að hafa það að leiðarljósi að vera hlýðin sálinni í hlutverki innra barnsins, heldur ættum við frekar að leggja áherslu á að kenna sálinni að vera hlýðin Guði og heilögu Krists-sjálfi hennar. Þið mynduð ekki leyfa börnunum ykkar að ráðskast með heimilishaldið ykkar og segja ykkur hvar þið ættuð að sitja eða standa, svo hvers vegna mynduð þið þá leyfa sálu ykkar, innra barni ykkar, að drottna yfir ykkur og skipa ykkur fyrir verkum?

Sálin er litla barnið sem er ætlað að verða Krists-barnið. Við skulum leiða sálir okkar eins og við erum leidd af heilaga Krists-sjálfi okkar. Ennfremur skulum við muna að sem foreldrar og kennarar berum við ábyrgð á vernd og menntun, ekki aðeins barna okkar heldur einnig sálar okkar, svo að við ættum að móta bæði sál barna okkar og eigin sálir eftir forskrift himnanna.

Að heila innra barnið

Hinir uppstignu meistarar hafa boðist til að aðstoða sálina við lækningu innra barnsins.

Jesús

Í fyrirlestri 5. júlí 1991 sagði Jesús:

Þið megið kalla til mín er þið fylgið fordæmi hinnar Guð-frjálsu veru minnar, frá sveinbarninu í móðurkviði til sonar Guðs, frá ungbarnsþroska Krists, nýfæddum til sjö og tólf ára aldurs. Í öllum þessum þrepum gætuð þið kallað til mín, því hvert skref vígslu minnar samsvarar ykkar eigin skrefum. ... Ég mun leiða ykkur á innri stigum í gegnum þroskaþrepin frá getnaði efnislíkama ykkar í móðurkviði. Ég mun leiða ykkur í gegnum þessi skref sem var sleppt [í frásögnum Biblíunnar] þar til sál ykkar er fullviss um að þið hafið uppfyllt hvert skref sem Guð hefur ákvarðað fyrir ykkur sem ófrávíkjanlegan rétt ykkar.

Krishna

Drottinn Krishna hefur einnig boðið fram aðstoð sína við lækningu á ummerkjum (skrám) um sárindum þegar þið notið upptökur af möntrunum hans og bhajan (lofsöngvum). Krishna kennir ykkur að sjá fyrir ykkur nærveru hans yfir sjálfum ykkurr á þeim aldri þegar þið upplifðuð tilfinningalegt áfall, líkamlegan sársauka, andlegan sársauka, angist – öll ummerki um sársauka, allar skrár sem birtast ykkur frá þessari eða fyrri æviskeiðum. Þið getið beðið um að þessir atburðir í lífi ykkar renni fyrir orkustöð Þriðja augans eins og glærur sem færast yfir skjá eða jafnvel kvikmynd af atburðunum. Metið aldurinn sem þið voruð á þegar áfallið varð.

Sjáið síðan fyrir ykkur Drottin Krishna á þessum aldri – sex mánaða, sex ára, tólf ára, fimmtíu ára – og sjáið hann standa yfir ykkur og yfir öllu ástandinu. Ef aðrir koma við sögu sem valdið hafa sárindunum, sjáið þá nærveru Drottins Krishna í kringum þá líka uns þið með þessari tilbeiðsluþula úthellið slíkum kærleika til Drottins Krishna að hann tekur við ástúð ykkar, margfaldar hana í gegnum hjarta sitt, sendir hana aftur til ykkar og umbreytir atvikinu og þessum ummerkjum.

Ef þið sjáið alla sem komu við sögu vandamálsins, reiðinnar, byrðinnar, sem Drottinn Krishna yfirskyggir, þá skiljið þið að þið getið staðfest í hjarta ykkar að það er í raun enginn veruleiki til nema Guð. Aðeins Guð er raunverulegur og Guð setur nærveru sína yfir þær aðstæður með persónugervingu sjálfs síns í Drottni Krishna.

Til frekari upplýsinga

Elizabeth Clare Prophet hefur gefið út hljóðupptöku af tilbeiðslulögum, Krishna: The Maha Mantra and Bhajans sem hægt er að nota til að lækna sársaukafullar minningar. Fáanlegar hjá www.AscendedMasterLibrary.org.

Heimildir

Pearls of Wisdom, 38. bindi, nr. 29.

Pearls of Wisdom, 36. bindi, nr. 26.